Rodín Kaufmann

En el ressona lo percors de sos parents. Rèires artesans li an transmes lo gost de la bèla òbra meticulosa. Una maire ensenhaire provençala li a balhat l'amor de las letras, un paire musician aleman, comedian e regidor de Fassbinder, li a montrat los camins de l'aventura de l'esperit.
Son enfància viatjadora, Maroc, Egipta e Liban, l'an fait poliglòt e curiós dels autres e de lors culturas. A Salé, Rodín es marcat pels musicians gwana amb los quals son paire jòga del Moog. Al Caire, pren lo hip-hop de front e crea un crew de dj. A Beyrouth practica lo grafiti e descobrís la musica occitana.
De retorn a Marsilha, apren lo provençal e rencontra Denis Sampieri e Manu Barthélemy. Los tres amics cantaires jonhon lo Còr de la Plana en 2001. Al sen del còr polifonic e percussiu, Rodín travèrsa doas decadas ponctuadas de tres albums e de concèrts internacionals dins festenals e salas prestigiosas (Womad, Olympa, le Carnegie Hall...)
En parallèla son univèrs pren forma. L'imaginari totjorn afilat, aquerís la mestresa d'instruments e otisses de produccion musicala, coma de tecnicas de dessenhs, de gravadura, d'estampariá o de tatoatge. En 2013, Rodín monta lo labèl Pantaís Recòrds per fin de produire un primièr single : Indignats, en duò amb Citizen Chance, rapaire de Brooklyn. Multiplica los projèctes : Sorn, 5 cantaires percussionistas que tornan interpretar cants funèbres collectats al sègle XIX sus fons de percussions de pèiras e de bòstia a bordon, Uèi ont un aparelhatge electronic espectacular afortís las voses e frapas de 4 musicians engatjats. En 2015, a la demanda del CIRDÒC, Rodín presenta Claus Sens Clau sa primièra exposicion que mescla dessenhs, vidèos, installacion, pegatges, serigrafia e creacion sonora.
En 2021, sortís son album manifesta Pantais Clus (rêve clos).

La lenga del poèta es multipla. Una miriada de mots, de signes e de sons la compausan. Quand Rodín canta, joga o dessenha, nos ofrís lo monde coma sos senses l'an tradusit, amb la justessa de la passion.
 

Rodín Kaufmann en musica