Çò que nos reünís ? Lo solelh
La lutz gotejada de las parets
Una cèrta qualitat de vida dison las agéncias
Un agach que nos tomba dessús, dardalhant, e fa créisser d’ombras
Cèrqui l’ombra per evitar de rebalar la mieuna disiá la grand
que son cap desapareissiá jos son interminable capèl de palha a 4 sòus.

A la recèrca d’uèi
sens se trachar que va al revèrs de contunh
repapiaira.

A tres lengas en ela.
Una per la vergonha e l’autra per l’ostal
seguida de pròche per la lenga sociala
La de las reveréncias e dels risolets grasses
Una lenga vermelhon, una blava sens asuèlh, una verda e plan sonhada
Passatge de l’una a l’autra al fial dels mots que s’enfilan o que fan de rabas
cossí se ditz
…
Fa un brave temps uèi quin canhard