Sèm un pauc secs davant la pagina quand cal parlar de las flors que ne coneissèm quitament pas lo nom.
Levat las marridas
las nosiblas
las plantas malas que se mesclan dins lo beton deliciós
lo quitran plan net e lavat-refrescat pervertit per las èrbas.
Las plantas pichonas que creisson e que rosegan
3 còps mai grandas que l’espaci que se son trobadas.
Sustot las marridas,
las envasivas
las que venon d’endacòm mai, las tropicalas e las pas endogènas
quand n’i a una va plan
lo bruch e l’odor de las plantas
Las èrbas fòlas
las prusentas e las pugnaças
las èrbas de bruèissas que rendon fadat e capbord
las plantas maleficas, las allucinogènas e las tua-moscas
las marridas
sèm inagotables sus aquò
i coneissèm pas res mas ne parlam
propausam de las brutlar, de las copar menudas, de las redusir en polvera
per perfumar o per deserbar
las èrbas fòlas